上個星期，有位用戶喺 kado.hk 打「啓暴龍」搵卡，一張都搵唔到。
唔係我哋冇快龍嘅卡，係我哋個搜尋唔識廣東話。「啟暴龍」係快龍（Dragonite）嘅香港舊譯，2016 年之後官方唔再用；佢打嘅「啓」仲要係異體字，同標準嘅「啟」喺電腦入面根本係兩個字。一個香港人用最自然嘅方式搵一隻由細叫到大嘅精靈，喺一個香港人整嘅圖鑑度食白果。
呢單嘢令我哋認真坐低，做咗一次香港譯名考古。愈查愈發現：呢批名唔止係集體回憶，佢係一個有明確截止日期、永遠唔會再增長嘅封存名單。
呢啲名邊度嚟？
1998 年 11 月 16 日，TVB 翡翠台首播《寵物小精靈》。比卡超、車厘龜、奇異種子呢批名，好多人（包括本文初版）以為係配音組隨手譯、日方隻眼開隻眼閉 — 錯。隻隻名都係同日方傾返嚟。
當年香港代理係羚邦國際。羚邦主席趙小燕 2026 年上《The Do Show》訪問親口講：第一輯 151 隻小精靈，每個名都要「由日文轉成中文，再將中文嘅命名邏輯翻譯返做日文」，逐個解釋畀日方聽、逐個批。中間仲有一段今日聽返會呆嘅前傳：Pikachu 起初嘅候選名係「比卡蕉」，因為佢係黃色 — 係羚邦說服日方「香港人文化上唔會咁改名」，先至定案做「比卡超」。連配音都跟足規矩：粵配比卡超把聲，仲要疊返日本原裝聲優嘅 Pikachu 聲上去。
所以呢批名唔係民間自發，係正式授權、逐個名同日方傾出嚟嘅官方港譯（本文初版錯寫成「民間翻譯、日方事後默許」，多謝讀者指正，詳見文末勘誤）。定案之後，配小智配足七年嘅盧素娟、一代一代交棒嘅比卡超配音員，就係將呢批名讀入成代香港人腦入面嘅人。
嗰陣時三地三個世界：香港《寵物小精靈》、台灣《神奇寶貝》、大陸民間《口袋妖怪》。同一隻精靈三個名，行貨都要分港版台版。
2016：分水嶺
2016 年 2 月尾，The Pokémon Company 社長石原恒和拍片宣佈：配合首個官方中文版遊戲《太陽/月亮》，三地譯名統一做「精靈寶可夢」（2019 年再簡化做「寶可夢」）。官方講法係集三地之大成：「精靈」取自香港、「寶」取自台灣、「寶可夢」音譯 Pokémon。
同年 5 月 10 日，首 151 隻「統一」譯名公佈：151 隻入面，93 隻唔再用香港舊譯。比卡超變皮卡丘、車厘龜變傑尼龜、奇異種子變妙蛙種子。
半個月後（5 月 30 日），約 20 人由遮打花園遊行到日本駐港總領事館，要求保留「比卡超」；遊行前有超過 6,000 人聯署。事件上咗 Washington Post、Quartz、Kotaku。任天堂冇讓步，最終連 TVB 都因為譯名問題放棄續購，18 年嘅《寵物小精靈》喺 TVB 落幕。
順帶一提三地溫差：台灣人都嬲（PTT 鬧「乘龍變拉普拉斯好離譜」），但停留喺論壇層面；大陸因為「精靈寶可夢」2011 年已經喺 CCTV-6 用緊，2016 年對佢哋只係追認現狀。三地入面香港反應最激烈，因為香港輸嘅唔止一個名，係成套廣東話讀音。
數據：190 / 1,025
我哋將 kado 圖鑑入面全部 1,025 隻精靈逐隻對過。曾經有過同而家現行譯名唔同嘅香港舊譯嘅，一共 190 隻：完整對照表喺 香港寶可夢譯名對照表。
| 世代 | 有港舊譯 | 該代總數 |
|---|---|---|
| Gen 1（1996） | 93 | 151 |
| Gen 2（1999） | 26 | 100 |
| Gen 3（2002） | 13 | 135 |
| Gen 4（2006） | 20 | 107 |
| Gen 5（2010） | 20 | 156 |
| Gen 6（2013） | 18 | 72 |
| Gen 7-9（2016 後） | 0 | 304 |
Gen 1 覆蓋最深（六成有獨立港譯），隨動畫代理轉手逐代遞減；2016 年《太陽/月亮》後登場嘅 304 隻，一出世就係現行譯名，連「被改名」嘅機會都冇。
仙子伊布係最令人唏噓嘅例子：2013 年先登場，照香港慣例應該叫「仙子伊貝」。2014 年 TVB 播《寵物小精靈XY》粵配，到佢出場嗰集，用嘅已經係片商提供嘅台譯 — 當年真係有觀眾電郵去 TVB 問點解唔跟「伊貝」，TVB 回覆「譯名由片商提供」。即係話封存唔係 2016 年先開始，係之前已經靜靜哋進行緊；「仙子伊貝」呢個名，香港人期望過，但始終差一步冇正式出過街。
呢就係「封存名單」嘅意思：190 呢個數字，永遠唔會再大。
邊個贏邊個輸？
「香港名全滅」其實係錯覺。我哋逐格對過巴哈姆特整理嘅港台譯名對照表（Gen 1-6 港台譯名唔同嘅一共 131 隻）：
- 跟台灣舊譯：91 隻（約 69%）
- 跟香港舊譯：10 隻（約 8%）
- 兩邊都唔要、另起新名：30 隻（約 23%）
香港贏咗嗰 10 隻，逐隻列返出嚟留念：大比鳥（台：比雕）、袋獸（台：袋龍）、烈箭鷹（台：烈箭鶲）、卡拉卡拉（台：可拉可拉）、鐵殼蛹（台：鐵殼昆）、布魯／布魯皇（台：布盧／布盧皇）、黏美兒／黏美龍（台：黏美伊兒／黏美露龍）、鋼炮臂蝦（台：鋼砲臂蝦）。
台灣人當年鬧爆「比雕變大比鳥」。佢哋唔知嘅係，大比鳥呢三個字香港人叫咗十幾年。
仲有半隻：伊布。個名本身係台灣嘅（香港舊譯「伊貝」），但成個家族嘅命名結構 — 水伊布、火伊布、雷伊布 — 係跟香港「水伊貝／火伊貝／雷伊貝」嘅「屬性＋本體」格式，唔係台灣嘅「水精靈／火精靈／雷精靈」。台灣人先係要重新適應嗰班。
至於兩邊都唔要嘅 30 隻，最出名係拉普拉斯：香港背背龍、台灣乘龍，官方直接音譯日文，兩地一齊心碎。仲有大甲 — 港台難得同名，都要改做「凱羅斯」。香港獨有嘅疊字系就全軍覆沒：超夢夢變超夢、夢夢變夢幻、鳳凰變鳳王。
譯得最好嗰啲，正正係譯唔返嘅
睇返呢 190 個名，最唔捨得嘅係嗰批用廣東話先譯得出嘅：
高竇貓（Persian）：「高竇」係廣東話獨有詞，解高傲擺款，普通話根本冇呢個詞；「竇」仲同 Persian 個音暗中呼應，一個名做齊音譯意譯。行路草（現譯走路草）：廣東話「行路」、普通話「走路」，一隻精靈個名見證緊兩種語言點樣行路。仲有傻鴨（現譯可達鴨）、大隻牛（現譯肯泰羅）、車厘龜 — 呢批名冇得「統一」，因為佢哋一離開廣東話就唔成立。
我哋做咗啲乜
Kado 係香港人整嘅圖鑑，我哋覺得呢 190 個名唔應該淨係擺喺維基百科嘅「舊譯」欄。所以上星期我哋做咗幾件事：
- 全站精靈名以香港舊譯行先：你喺 kado.hk 見到嘅係比卡超、啟暴龍、高竇貓，現行譯名做副名跟喺後面
- 3,207 條譯名 alias：打邊個年代嘅名都搵到 — 比卡超、皮卡丘、ピカチュウ、Pikachu，全部指返同一隻
- 208 個異體字對照：「啓暴龍」同「啟暴龍」而家搜出嚟一樣；竜／龍、兽／獸都摺埋一齊
- 跟真實搜尋數據補漏：上線後逐個零結果搜尋詞睇返，「甲賀忍」由 0 變 197 張卡、「空座」0 變 230、「月亮伊」0 變 160。香港人點打字，個搜尋就點學
嗰位打「啓暴龍」嘅用戶，而家可以搵返佢隻啟暴龍。
結尾
190 個名，數字唔會再增長，但唔代表要消失。你細個叫開嘅嗰個名，喺 kado.hk 仲係正名。
去 圖鑑 對返 — 你仲記得幾多個？
勘誤及補充（2026-07-24）
本文出街後有讀者指正兩點，我哋查證後屬實，已經修正：
- 初版寫「呢批名係未經官方欽定嘅民間翻譯、日方事後默許」— 錯。羚邦主席趙小燕喺《The Do Show》訪問親述：151 隻名逐個同日方傾、逐個解釋、日方審批，仲有「比卡蕉」呢段前傳。「民間翻譯」係任天堂 2016 年形容遊戲譯名嘅講法，唔應該套落動畫譯名度。
- 初版寫「仙子伊貝呢個名從來冇存在過」— 太絕對。《寵物小精靈XY》粵配 2014 至 2017 年有喺 TVB 播出，Sylveon 出場嗰集用咗片商提供嘅台譯，當年有觀眾特登電郵去 TVB 追問點解唔跟「伊貝」。期望真實存在過，個名只係差一步冇印出街。
順帶補多粒料：TVB 之後接手嘅係奇妙電視（2018 年改名香港開電視，即今日 HOY TV）— 2017 年 12 月 15 日起喺 77 台播《寵物小精靈 太陽&月亮》粵配（本文初版錯寫成 ViuTV — ViuTV 從來冇播過寶可夢，多謝讀者指正）。嗰個版本 Pikachu 大多直接讀英文原音，字幕先至寫「皮卡丘」— 統一到個字，統一唔到把口。
多謝指正嘅讀者。呢段歷史因為有你哋先至完整。
再勘誤（2026-07-25）：「港譯」定「舊台譯」？
讀者 @peter.cck 再踢爆深一層，我哋查證後認：190 個名入面，唔係個個都係香港原創。
關鍵喺代理。Gen 1-2 年代係羚邦逐個名同日方傾出嚟嘅港譯；但 Gen 3（2002 年）之後，寶可夢港台代理同樣係群英社，香港粵配絕大部分直接跟台灣譯法，一直去到 Gen 6 先重新分家。即係話 Gen 3-5 嗰 53 個「舊譯」，好多當年係港台通用，唔係香港獨有。我哋抽驗咗讀者提出嘅例子，全部屬實：
- 毒粉蝶（今：毒粉蛾）— 港台當年同用，而且佢根本係蛾唔係蝶
- 漂浮泡泡（今：飄浮泡泡）— 港台同用，仲要係個錯別字
- 無殼海牛／海牛獸（今：無殼海兔／海兔獸）— 港台同用；海牛同海兔係兩種生物
- 雷希拉姆（今：萊希拉姆）— 港台同用；同代明明另有隻真・電系嘅捷克羅姆，改「萊」先啱返日文音
- 同一個 pattern 仲有暴蠑螈、波波鴿、火神蟲⋯⋯
不過都有例外：葉伊貝／冰伊貝係真港譯（台灣當年叫葉精靈／冰精靈），跟返香港「屬性＋伊貝」家族格式；立方獸Z 都係（台灣嗰邊叫 3D龍Z）。
所以我哋喺數據庫加咗個來源分層，190 個名逐個標返：HK_ORIGINAL（考證到香港獨有 — 140 個）、SHARED_ERA（群英社年代港台通用 — 8 個）、UNVERIFIED（未完全考證 — 42 個，唔扮清楚，查到先改）。網站照樣顯示呢批舊譯，因為無論個名源頭喺邊，佢的確係嗰代香港人叫開嘅名；但「190 個香港譯名」要收窄講法：190 = 曾經喺香港用過、而家唔再用嘅名；當中確認香港原創嘅係 140 個。
另外用詞上都有一個修正：本文（同埋 kado.hk 全站）由「官方統一譯名」改稱「現行譯名」— 讀者指正：所謂「統一」其實只限港台（中國大陸版另有一批唔同嘅譯名），而舊譯當年同樣經官方批准，「官方統一譯名」呢個講法兩頭唔穩。
多謝 @peter.cck。考據就係咁 — 愈修愈長，愈修愈真。
主要參考：The Do Show《DO IT RICH》羚邦趙小燕訪問（2026-03）、維基百科「寶可夢中文版命名爭議」及「寵物小精靈XY」、巴哈姆特台港譯名對照表（本文 91/10/30 為逐格重新統計）、轉角國際 udn、HK01、港語學、粵典 words.hk、Journal of Intercultural Studies (2018)、Bulbapedia「List of Chinese Pokémon names」及各精靈條目。圖鑑數據：kado.hk pokemon_species 1,025 隻 / 譯名 alias 3,207 條。