卡價數據方法

KADO 嘅卡價由三個成交數據源組成，唔同卡按語言／市場自動揀源，唔會人手撬：

• eBay 全球「已售出（Sold）」成交紀錄 — 國際市場主價位，涵蓋日文、英文卡。
• Yahoo! Japan 拍賣落札價 — 日文卡本土主價位，撈埋 Yahoo!拍賣同 PayPayフリマ 兩個平台嘅真實成交（唔係在售叫價）。
• Snkrdunk（日本卡牌交易平台）「状態A」成交 — 淨計賣家標「状態A（近全新）」嗰批成交，只喺 Yahoo 同 eBay 兩邊都攞唔到未評級價嗰陣先補位，並喺頁面上明確標示「A 品」。「A 品」同一般未評級（品相有好有壞撈埋一齊計）唔係同一件事，實測中位價可以差 3–5 成，所以絕對唔會當一般未評級價出街。

PSA 評級卡價同樣以實際成交紀錄為準，並按評級分數（PSA 9／10 等）分開追蹤。

eBay 同 Snkrdunk 成交每日更新一次；Yahoo 本土價每日分批爬取，熱門卡包每日更新、較舊卡包每 2–7 日更新一次。每張卡嘅頁面會顯示該卡最後一次有成交數據嘅更新日期，冇成交就唔會顯示假嘅「今日」日期。

日文卡以日本本土成交做主價位，計法分兩步：

• 近 90 日成交，愈近愈重 — 每筆成交嘅權重隨時間衰減，每過 30 日權重減半（即係「半衰期」30 日），用嚟計一個加權中位數，令近期成交蓋過舊成交，但唔會完全捨棄。
• 同時計一個 60 日基準價 — 短窗中位數，喺近 90 日成交太少（尤其新卡包剛出）嗰陣頂住個位；有 3 筆或以上正式拍賣／Snkrdunk 成交先用「較可信」嗰批，唔夠就用該窗口全部成交。
• 兩個數按樣本量加權混合 — 樣本愈多，加權中位數佔嘅比重愈大；樣本太少（少過 3–5 筆），60 日基準價佔比重反而更高，避免單一兩單成交就話事。
• 異常值先剔走 — 用「取對數後計中位絕對差」（log-MAD）方法：先將成交價轉做對數，計中位數同埋每筆偏離中位數幾遠，偏離超過門檻（約 3 倍標準化 MAD）嘅成交當異常剔走先計價，成交筆數太少就退而求其次用「中位數 ÷3 至 ×3」嘅寬鬆區間。呢個方法可以擋走單一天價／單一筆超平成交（例如標題錯、規格唔對）扭曲個價。
• 極平嘅在售 listing 有審慎排除 — 部分成交嚟自明顯低過市場行情嘅極平上架（多數係品相不明／拍賣尾聲雜項），我哋分卡包逐步驗證後先放行，未驗證嘅卡包依然採用較保守嘅下限，寧願少計一啲都唔想個中位數畀極端平價拉低。

計出嚟嘅價會分四級可信度：

• 數據充足 — 近 90 日有 6 筆或以上有效成交（衰減後計），最近一單喺 14 日內，價格離散度低。
• 參考價 — 成交量或新鮮度稍遜（例如 2–5 筆、45 日內），仍可用但講明係參考。
• 樣本少 — 有成交但唔夠上面兩級門檻，出價時會加標示。
• 估算價 — 近 90 日完全冇成交，用 60 日基準價（或更早嘅參考價）推算，會明確寫「估算」二字，唔會扮成真實成交價。

eBay 側另外用近期成交筆數分「數據充足 / 參考價 / 樣本極少 / 暫無成交」四級，零成交嘅級數唔會出價（見下面「兩個警示」）。

原始成交以美元（USD）／日圓（JPY）記錄。港元（HKD）換算用固定匯率 USD × 7.82，全站統一，僅供參考，不構成報價。

日圓轉美元用嘅係浮動匯率，每日更新一次，並非固定數字 —— 卡頁上「匯率 ¥⋯/US$」呢一行顯示嘅就係計價當日實際用嘅美元兌日圓匯率，會跟住市況每日變動。

• 升跌幅比較「最近一個有成交嘅價位」同「大約 7 日前」兩個時間點，兩點之間至少要隔幾日先計，太貼近會當雜訊。
• 成交筆數要夠（睇返上面嘅可信度分級）先會計升跌 —— 冇成交（NONE）嘅級數唔會顯示價都唔會計升跌；「A 品」補位嘅卡有獨立門檻：近 7 日同前 7 日各要有 5 宗或以上成交、前一週中位價要有一定水平，先會出升跌幅。
• 見唔到「本週 ±%」= 呢張卡近期成交未夠計，唔代表冇人買賣，亦唔代表跌／唔郁。我哋寧願唔出呢個數，都唔想用單一兩筆成交砌一個唔可信嘅升跌幅出嚟。

• 「樣本極少 / 樣本少」 — 呢個價位近期只有 1 至幾筆成交紀錄支撐，唔係完全冇數，但一兩筆成交好易受個別買家出價習慣影響，僅供參考。
• 「平均同中位差距大」 — 當同一批成交嘅「平均數」同「中位數」相差超過 25%，代表呢批成交價格好分散（例如有一兩單特別高或特別低），呢種情況下平均數同中位數兩個數都只可以當參考，唔應該當成一個穩定嘅市價。

• 唔會人手調整價格
• 唔會用低可信度數據做主價或榜單
• 零成交嘅價位唔會用舊數據扮現價出街，只會標「暫無成交價」
• 卡價僅供收藏參考，不構成投資或買賣建議

歡迎引用，請註明「KADO 卡道（kado.hk）」並附上該卡頁面連結同更新日期。想知我哋係邊個，可以睇 關於 KADO。